علاج فطريات القطط Feline fungi

فطريات القطط 

رمضان كريم عليكم 💕

موضوعي اليوم عن الفطريات اللي هيا كابوس مربيين القطط .. لكن بعد تجربتي مع بستي عرفت انه هو مرض علاجة سهل لكن يأخذ وقت ويبغاله صبر اهتمام وطولت بال .. 

و هو مرض جلدي طبيعي يصابو بيه القطط زي ما الإنسان يصاب الزكام ! .. 

وممكن تعدي الإنسان لكن الحمد الله ما انعديت كنت حريصه اني ما المس المنطقة االي فيها فطريات وتقريبا كنت كل كم يوم اخد فتامين سي عشان ارفع مناعتي .. 

لا تعزولهم بحبسهم !! 

اعزولهم عن اماكن نومكم فقط ... حاولو تنظيف البيت كل يومين بالديتول والتعقيم فقط حرص على عدم انتقال العدوى بذات لو كان في البيت اطفال وكبار في السن

بعض من الاسباب الرئيسية اصابة القطط بالفطريات 

الصراحة هيا اسباب كثيرة ومنها : 

١- عدم تعرض القط للشمس

٢- قلة مناعة القط 

٣-  عقد في الشعر لعدم تمشيط شعر القط 

٤- كثرة الدهون في اكل القط 

٥- الرطوبة العالية وجلوس القط لساعات في منطقة حارة ورطبة فيتسبب ذلك لتعرق القط وهذا السبب غالبا ما يصاب به القطط ذو الشعر الطويل والكثيف 

هذه بعض الاسباب مو شرط كلها ممكن سبب واحد من هذه تكون في قطتك وتصاب بالفطريات ..

اكتشاف الفطريات 

هي  منطقة فارغه من الشعر وفيها قشور بيضاء او سوداء اذا شفتيها حاولي تدوري في باقي جسم القط عشان تتأكدي اذا في غيرها وعشان تعرفي هيا في اي مرحلة اذا كانت منتشره في كامل الجسم فأنصح بالحلاقة لأنها حتساعدك انها تتشافى في مدة اقصر  بإذن الله..

علاج الفطريات 

ادوية العلاج من الصيدليات البشرية 

١- القفازات سعرها بين ١٢ -١٥ ريال 

٢- البيتادين Betadine شيء و ٣٠ ريال ما اتذكر بضبط 

٣- بخاخ لاميزيل Lamisil ٤٣ ريال 

أو 

كريم لاميزيل ب شيء ٢٠ ريال اتوقع 

٤- حبوب سبورانوكس Sporanox ١٠٠ ريال 

٥- شامبو نيزورال  Nizoral شيء و ٣٠ ما اتزكر بضبط 

خطوات العلاج 

اول حاجة لازم كل يوم تشمسي القط لمدة بين ١٥ دقيقة الى ٣٠ ساعة ..

 حتحتاجي لقفاز طبي عشان تضمني انو ما تنعدي وانتي بتنظفي المكان

والبيتادين يطهر المنطقة والشاش تحطي فيه البيتادين وتفركي المنطقة لازلة القشور البيضاء والسوداء 

بعد ما تحطي البيتادين خليه ينشف وحطي كريم او بخاخ لاميزيل 

اذا كان الكريم حطي وافركي المنطقة لمدة ١٠ ثوان 

واذا بخاخ اكتفي بانك تحاولي تلهي القطة اللين ما ينشف عشان ما تمسحه 

ما يفرق في الاستعمال الاثنين كويسين انا استخدمتهم لكن البخاخ اغلى في السعر لانه مركز اكثر .. 

ذي الخطوتين البيتادين و الاميزيل مهمه جده تعمليها كل يوم من مرتين ل اربع مرات في اليوم  

كريم او بخاخ لاميزيل تستمري عليه لمدة شهرين من العلاج حتى لو شفتي الشعر بيطلع  (كلام الدكتور ) 

كل يوم لمدة اسبوعين تعطي القط نص كبسولة الدواء واليوم الثاني النص الاخر وهكذا ..

لكن قبل استخدام هذا الدواء لازم تراجعي الطبيب البيطري لإعطاء الكمية المناسبة لقطك لانو هذه الجرعة كانت مناسبة لوزن وعمر قطتي .. 

 ترويش القط بهذا الشامبو  مع فرك اماكن الفطريات بفرشة اسنان وترك الشامبو على جسم القط من ٣ الي ٥ دقائق ثم غسله .. كل اسبوع روشية مره وحدة واذا حسيتيه اتحسن والشعر طلع خليه كل اسبوعين 

في كمان الابر الروسية حقن الدكتور بستي بيها واتوقع كان سعرها ١٢٠ ريال 

وللوقاية من الفطريات حاولو تشميس قطتك  من مرتين الى ثلاث مرات في الاسبوع 

وتمشيط شعرها في الاسبوع ع الاقل ثلاث مرات 

والاهتمام بنوعية اكلهم لرفع مناعتها . 

وتقريبا هذه هي الطريقة اللي اتبعتها مع بستي بإشراف دكتور بيطري في عيادات التحلية  .. 

تمنياتي لقططكم الشفاء 

💗😻